Jab saawan mujhse milne chala aaya
Kuch baatein thandi hawaon se ho gayi
Kuch kadam geeli zameen par pad gaye
Kuch khayal hanseen nazaaron mein doob gaye
Kuch lamhe qudrat ki qadar daani mein khoob gaye
Kuch boondein mere intezaar mein tham gayi
Kuch boondein mujhe chod aage badh gayi
Barasti boondon ki fitrat toh samajh nahi payi
Par mujh pe gire chand pani ke qatron mein hi khushi payi
Bheegi raah aiyna ban apne wajood se mila gayi
Mitti ki bheeni khushboo fiza mein taazgi kar gayi
Yeh saara jahaan ek rangeen tasveer ban gayi
Jaise dharti ki mail ek pal mein dhul gayi
Kayi roz baad do dost yoon hi mil gaye
Baarish mein bheeg mukhde kuch aise khil gaye
Un baaton ki umr baarish se lambi ho gayi
Aur dekhte hi dekhte dooriyan kam bhi ho gayi
Kuch aarzoo kaagaz ke naav mein sawaar ho gaye
Kuch, barso se padi adhuri kitaab puri karne mein jut gaye
Haath khidkiyon ki nami saaf karne ko khud hi gaye
Aur zindagi ke asli maaine achanak benaqaab ho gaye
Aankhen khuda ki shukr guzari mein jhuk gayi
Is karishme ki khubsoorti dekh dil ki dhadkan ruk gayi
Zindagi mein baarish ko nahi paaya toh kya paaya
Aisa hi kuch socha maine
Jab saawan mujhse milne chala aaya
